O delegado da Xunta na Arxentina, Alejandro López Dobarro, asistiu aos actos de celebración do centenario da Asociación Civil Hijos del Ayuntamiento de Zas en Bos Aires, no que participaron numerosas e numerosos galegos e descendentes de galegas e galegos afincados na capital arxentina.

Neste acto, López Dobarro agradeceu o labor desta entidade en prol de toda a colectividade galega en Bos Aires e, en especial da nosa cultura e, por suposto, da nosa lingua. Tamén recordou que precisamente esta entidade é a depositaria na Arxentina da Medalla do Parlamento de Galicia, que lle foi outorgada á emigración galega  pola súa aportación esencial no desenvolvemento da Comunidade, destacando o delegado da Xunta na Arxentina a importancia da colectividade que ten ante si o reto de conservar e manter viva a memoria material e inmaterial de Galicia neste país do Cono Sur.