O presidente da Xunta, Alberto Núñez Feijóo, resaltou o espírito competitivo e o esforzo que exhibiu a selección española de balonmán, que integra a viguesa Begoña Fernández, para conseguir a medalla de bronce nos Xogos Olímpicos de Londres, logo da vitoria do combinado español ante a selección de Corea do Sur.

Feijóo subliñou o “histórico día” que o pasado sábado viviu o deporte galego feminino que, a esta medalla de bronce suma o ouro acadado polas regatistas galegas Támara Echegoyen e Sofía Toro, e o diploma olímpico da padexeira Teresa Portela. Esta medalla supón, ademais, a cuarta do deporte galego nestes Xogos. Alberto Núñez Feijóo trasladou, especialmente, as súas felicitacións á internacional pivote galega, que disputa nesta edición os seus primeiros Xogos Olímpicos.

Pola súa banda, o secretario xeral para o Deporte, José Ramón Lete Lasa, celebrou que o equipo nacional puidese facerse co bronce e resaltou o “extraordinario rendemento” de Begoña Fernández nos Xogos, “onde ten ostentado magnificamente a capitanía do combinado español”, remarcou.