A Xunta súmase un ano máis ao recoñecemento ao labor das e dos cooperantes galegos
Celebrouse a sexta edición do Día das Persoas Cooperantes.
Segundo datos do Rexistro de Cooperantes Galegos no Exterior son máis de 100 as e os galegos cooperantes no exterior.
A Xunta súmase un ano máis ao recoñecemento público do labor que desenvolven as persoas cooperantes, felicitándoas pola profesionalidade que imprimen cada día ao seu traballo, o que permite avanzar cara a consecución dunha cooperación de calidade.
Desde a Xunta de Galicia quérese recoñecer o labor diario deste colectivo, que desenvolve en moitas ocasións un traballo silencioso e pouco visible, pero imprescindible para levar a cabo intervencións sustentables e de calidade nos proxectos de desenvolvemento e nas crises humanitarias que se viven na actualidade, como é o caso da guerra de Siria ou a crise alimentaria do Sáhel africano.
Dado o agravamento nos últimos anos da situación das persoas cooperantes que traballan en zonas especialmente conflitivas, un dos principais retos da Administración é garantir que estes e estas profesionais realicen as súas actividades nas mellores condicións posibles e que se respecten os seus dereitos, tendo en conta a especialidade dos lugares onde desenvolven o seu traballo. Coa aprobación no ano 2006 do Estatuto do Cooperante estableceuse un marco normativo que dignifica o traballo deste colectivo.
No ano 2006, coincidindo coa aprobación polo Consello de Ministros do Estatuto do Cooperante, estableceuse en España o 8 de setembro como día especialmente dedicado ao colectivo de traballadores e traballadoras que desenvolven o seu labor profesional no exterior, en colaboración coa poboación dos países beneficiarios da política de axuda para o desenvolvemento. Trátase dunha data que coincide coa sinatura, no ano 2000, da Declaración do Milenio, nun compromiso histórico de traballo conxunto para erradicar a pobreza extrema no mundo.
As cifras en Galicia
Segundo datos do Rexistro de Cooperantes Galegos no Exterior realizado no ano 2010, son máis de 100 os galegos e galegas cooperantes no exterior. A meirande parte destes e destas profesionais desenvolven o seu labor en América Latina, tradicional destino da axuda galega, aínda que se observa tamén unha presenza importante en África e Asia.
Cómpre destacar tamén que, segundo datos do mesmo rexistro, máis do 50% destas persoas cooperantes traballa ao servizo das ONGD, principais axentes da cooperación para o desenvolvemento. Ao igual que acontece en todo o sector, o perfil das persoas cooperantes é maioritariamente feminino, representando as mulleres máis do 60% do total do colectivo cooperante galego no exterior.
O mundo da cooperación para o desenvolvemento
O importante labor que están a desenvolver as persoas cooperantes non tería sido posible de non ser pola importante estrutura na que se sustenta o sector da cooperación para o desenvolvemento, formada polo persoal que traballa desde España, polos socios locais que executan os proxectos en terreo e, sobre todo, polo persoal voluntario de cooperación para o desenvolvemento, que tanto aquí como nos países destinatarios da axuda contribúen a construír e difundir o discurso da solidariedade internacional.
Novas relacionadas