Feijóo salienta o marcado carácter económico da súa viaxe a Alemaña para incrementar os lazos, amosar as capacidades dos sectores da automoción, portuario e turístico galegos e abrir novas oportunidades

O titular da Xunta rematou a súa estadía no país xermano cunha visita ás instalacións da fábrica de Volkswagen.

“Estamos a falar dunha axenda tamén de recoñecemento á colectividade galega xa que, a través dela, puidemos poñer a disposición do pobo de Hamburgo, os produtos de artesanía e do sector agroalimentario de Galicia”, subliña.

Lembra que o Goberno galego tivo tamén a oportunidade de presentar Galicia -o Camiño de Santiago, o termalismo, a enogastronomía e a industria do mar- ao país xermano, nunha plataforma excepcional: a bordo do buque escola Juan Sebastián Elcano.

Ademais de reunirse con empresariado alemán con intereses en América Latina, o presidente da Xunta visitou o porto de Hamburgo, onde mantivo unha reunión co seu director.

O responsable autonómico finalizou a súa viaxe cunha visita ás instalacións da fábrica de Volkswagen, en Wolfsburgo, onde traballan 66.000 persoas, das cales 10.000 son enxeñeiras no departamento de innovación.

Listen to this page using ReadSpeaker
Wolfsburgo (Alemaña), 24 de xuño de 2014.

O presidente da Xunta, Alberto Núñez Feijóo, referiuse esta tarde, como balance da súa viaxe a Alemaña, á axenda de marcado carácter económico, onde Galicia deu a coñecer as súas capacidades nos sectores da automoción, portuario e do turismo co obxectivo de incrementar os lazos e abrir novas oportunidades.

“Estamos a falar, en definitiva, dunha axenda institucional co Land de Hamburgo; dunha axenda claramente económica no sector da automoción, no sector turístico e no sector portuario e, dunha axenda tamén de recoñecemento á colectividade galega xa que, a través dela, puidemos poñer a disposición do pobo de Hamburgo, os produtos de artesanía e do sector agroalimentario de Galicia”, afirmou.

Da xuntanza mantida co presidente de Hamburgo, Olaf Scholz, Feijóo destacou a posibilidade de establecer acordos no eido da FP dual, que inclúan intercambio de estudantes e prácticas en empresas alemás. “A formación é clave para o sector industrial de Alemaña e nos parece que é un excelente socio para poñer en valor a Formación profesional galega”, afirmou.

Así mesmo, lembrou que o Goberno galego tivo tamén a oportunidade de presentar Galicia -o Camiño de Santiago, o termalismo, a enogastronomía e a industria do mar- ao país xermano, nunha plataforma excepcional: a bordo do buque escola Juan Sebastián Elcano. “Presentamos –dixo- a 50 turoperadores alemáns Galicia como destino único, as súas capacidades gastronómicas, turísticas e culturais”, subliñou, co obxectivo de incrementar aínda máis o número de turistas procedentes de Alemaña.

Ademais de reunirse con empresariado alemán con intereses en América Latina, o responsable do Executivo autonómico visitou o porto de Hamburgo, onde mantivo unha reunión co seu director, Wolfgang Hurtienne, co obxectivo de incrementar lazos loxísticos e portuarios entre os portos galegos e o de Hamburgo, o segundo porto máis importante de Europa.

Nesta reunión participaron tamén os presidentes das autoridades portuarias de Ferrol-San Cibrao e de Vigo, co obxectivo de establecer contactos e seguir a traballar co porto de Hamburgo, aproveitando as plataformas portuarias de Galicia.

Feijóo finalizou a súa viaxe á Alemaña cunha visita ás instalacións da fábrica de Volkswagen, en Wolfsburgo, onde traballan 66.000 persoas, das cales 10.000 son enxeñeiras no departamento de innovación.

O titular da Xunta destacou a importancia desta visita para o clúster da automoción de Galicia que, xunto co CTAG e a industria de compoñentes, se desprazou ata Wolfsburgo para visitar a planta.

Nesta mesma liña, referiuse á importancia da visita, proximamente, a Galicia de Francisco García Sanz, membro do comité de dirección do grupo e presidente de Seat, co obxectivo de coñecer as industrias de compoñentes de automóbil galegas e o traballo que están a facer as e os 400 enxeñeiros do CTAG.

976 lecturas